- مريم رجب
- 0 Comments
- 138 Views
صوابع زينب هي من الحلويات الشرقيه المشهورة في مصر وبالنسبة لسبب تسميتها بصوابع زينب فالروايات مختلفة علي سبب التسمية ومنها ان اصلها بيرجع لمعركة ( عين جالوت ) بعد ما رجع الظاهر بيبرس لمصر بعد المعركه وأمر ان لازم يعملو احتفال ويعملو فيه اشهي الحلويات ولما اكل منها بيبرس عجبته وسأل كبير الطهاه عن اسمها فرد وقال ( أصابع زينب ) علي اسم الطباخه اللي عملتها وتسمت بعد كده صوابع زينب .
وفي روايات تانيه كتير عن سبب تسميتها بصوابع زينب .
وهي من الحلويات اللذيذة هنتعلم ازاي نعملها بطريقة سهلة وبسيطة.
مقادير صوابع زينب :
* كوباية من الدقيق .
* نص كوباية من السميد الخشن .
* نص كوباية من السميد الناعم .
* كوباية من الماية .
* معلقتين من السكر .
* معلقتين كبار من الزيت .
* معلقتين كبار من السمنة .
* نص معلقة صغيرة بيكنج باودر .
* نص معلقة صغيرة من الخميرة الفورية .
* نص معلقة صغيرة محلب مطحون .
* نص معلقة صغيرة يانسون مطحون .
* رشة من الملح .
* زيت للقلي .
مقادير الشربات :
* كوبيتين من السكر .
* كوبيتين من الماية .
* عصير نص لمونه .
* معلقة صغيره فانيليا .
طريقة التحضير :
* أول حاجه هنجهز الشربات هنجيب حله صغيرة ونحطها علي النار وننزل فيها بالمايه و السكر ونقلب كويس جدا لغايه ما يدوب السكر ونسيبها لغايه ما تغلي .
* اول ما تغلي هنحط عصير نص اللمونه ونقلب و أول ما القوام يبدأ يتقل هنرفعها من علي النار ونحط معلقة الفانيليا وبكده يكون الشربات جاهز .
* هنجيب ربع كوباية ماية وننزل فيها بالخميرة وشويه سكر ونقلبها ونغطيها ونسيبها علي جنب .
* هنجيب بولة غويطه ونبدأ ننخل الدقيق ونحط السميد الناعم والسميد الخشن و الملح و السكر و البيكنج باودر و المحلب المطحون واليانسون المطحون ونقلب كويس لغايه ما المكونات كلها تختلط ببعض .
* هنحط الخميره و الزيت و السمنة ونقلب كويس لغايه ما الدقيق والسميد يشربو السمنه والزيت تماما .
* هنبدأ ننزل المايه بالتدريج لان ممكن متحتجش لكمية الماية كلها ونعجن لغاية ما تبقه العجينة متماسكة وطرية هنغطي العجينة ونسيبها ترتاح نص ساعة تقريبا .
* هنقطع العجينه علي شكل كور صغيرة وبعدين نشكل كل كوره علي شكل صوابع ونجيب مصفاه سلك أو مبشرة ونفرد كل واحد علي المبشرة علشان تاخد شكلها المميز وبعد ما نخلص الكمية كلها هنغطيها ونسيبها ربع ساعه تقريبا ترتاح .
* هنجيب طاسة غويطة ونحطها علي النار ونحط فيها زيت كتير ونسيبه يسخن شوية ونبدأ ننزل بالصوابع في الزيت لغاية ما تاخد لون ذهبي ونطلعها من الزيت علي مناديل مطبخ وبعدين نحطها في الشربات ونرجع نصفيها من الشربات ونحطها طبق التقديم وبالهنا والشفا .
* وبكده نكون قدمنا طريقة عمل صوابع زينب اللذيذة بطريقة سهلة و بسيطة .
السعرات الحرارية و القيم و العناصر الغذائية :
لكل خمس قطع تقريبا من صوابع زينب :
* السعرات الحرارية : 330 سعر حراري .
أما بالنسبة للقيم و العناصر الغذائية فهي :
* تحتوي علي 57 جرام من الكربوهيدرات .
* تحتوي علي 9 جرام من الدهون .
* تحتوي علي 3.2 جرام من الدهون المشبعة .
* تحتوي علي 3.5 جرام من الدهون غير مشبعة .
* تحتوي علي 20.2 جرام من السكريات .
* تحتوي علي 2 جرام من الألياف الغذائية .
* تحتوي علي 6 جرام من البروتين .
* تحتوي علي 12.3 مليجرام من الكوليسترول .
* تحتوي علي 16.3 مليجرام من الكالسيوم .
* تحتوي علي 0.5 مليجرام من الزنك .
* تحتوي علي 19.1 مليجرام من الماغنسيوم .
* تحتوي علي 1.6 مليجرام من الحديد .
* تحتوي علي 91 مليجرام من الفوسفات .
* تحتوي علي 174.5 مليجرام من الصوديوم .
* تحتوي علي 90.4 مليجرام من البوتاسيوم .