- مريم رجب
- 0 Comments
- 160 Views
القرص الطرية أو القرص الفلاحي من المعجنات اللي بيحبها ناس كتير جدا وممكن ناكلها سادة وممكن محشية بالعجوه هنشرح طريقتها خطوة بخطوة بطريقة سهلة وبسيطه.
مقادير القرص الطرية:
* كوبيتين دقيق.
* نص كوباية لبن.
(ممكن تزيد او تقل حسب نوع الدقيق)
* نص كوباية سمنه.
* معلقتين كبار قشطة (وممكن نستبدلهم بزبادي)
* معلقة صغيرة سكر.
* رشة ملح.
* معلقة صغيرة خميرة.
* معلقتين كبار من اللبن البودرة.
* معلقة صغيرة بيكنج باودر.
طريقة التحضير:
* اول حاجه هنعملها اننا ننخل الدقيق كويس علشان العجينة تبقه هشة وخفيفة.
* هنجيب بولة كبيرة نحط فيها الدقيق المنخول واللبن البودرة والبيكنج باودر و الملح ونقلب كل المكونات الجافه دي كويس.
* هنجيب بولة صغيره ونحط فيها السكر والخميرة وشويه صغيره من اللبن الدافي ولما الخميره تبدأ تتفاعل هننزل بيها في البولة الكبيرة علي الدقيق ونقلب كويس.
* ونزود السمنه واللبن والقشطة او الزبادي ونقلب وبعدين نعجن كويس لمده متقلش عن 10 دقايق لغاية ما تبقه العجينة طرية.
* هنغطي العجينة ونسيبها في مكان دافي علشان تخمر.
* وبعد ما تخمر هنقطعها علي شكل كور متساوية ونرصها في صينيه مدهونه زيت ونضغط علي كل الكور ضغطه بسيطه علشان تدينا شكل القرص ولازم نسيب مسافه بين كل قرص والتاني علشان مليزقوش.
* وممكن نحشي العجينه بالعجوة او الملبن واحنا بنشكلها كرات.
* هندخل الصينية في الفرن علي درجة حرارة 200 واول ما تاخد لون ذهبي من تحت نشغل الشواية علشان يحمر وشها.
* نخرجها من الفرن ونغطيها اول ما تطلع علشان تفضل طرية وهشة وتقدم وبالهنا والشفا.
سر نجاح القرص الطرية:
* سر الريحه المميزة في القرص الطرية هي السمنه فالافضل اننا نستخدم السمنه الفلاحي.
* الدقيق اللي بنستخدمه لازم يكون دقيق متعدد الاستخدمات او دقيق فاخر ولازم ننخله علشان تكون القرص هشه من جوه.
* كميه الماية او اللبن نزودها بالتدريج علشان متكونش زيادة.
* نعمل اختبار الخميره قبل ما نستخدمها .
* نسخن الفرن الاول قبل ما نحط الصينيه.
* بعد ما نشكل القرص في الصينيه الافضل نسيبها ترتاح 5 دقايق قبل ما ندخلها الفرن.
* مننساش نسيب مسافه بين القرص لان حجمها ممكن يزيد وتلزق في بعض.
السعرات الحرارية والقيم الغذائية:
القرصه الواحده بها:
* السعرات الحراري : 479 سعر حراري.
* الكربوهيدرات : 68.9 جرام.
* البروتين : 11.4 جرام.
* الدهون : 17 جرام.
* الألياف : 2.7 جرام.
* السكر : 4.7 جرام.
* الصوديوم : 509 مليجرام.
* البوتاسيوم : 214 مليجرام.
* الحديد : 4 مليجرام.
* الكوليسترول : 3 مليجرام.
* الكالسيوم : 80 مليجرام.
* وبكده نكون قدمنا القرص الطريه الفلاحي بطريقة سهله وبسيطه.