- مريم رجب
- 0 Comments
- 62 Views
البيتزا من الاكلات اللذيذة جدا و اللى بيفضلها الجميع و لكن البيتزا مشهورة انها بتزيد من الوزن لانها تحتوى على عدد كبير من السعرات الحرارية و لكن ممكن اننا نستبدل بعض المكونات بمكونات تانيه و كده نقدر نقدمها من ضمن وصفات الرجيم و تكون عدد السعرات الحرارية فيها قليلة و صحية اكتر.
- المقادير:-
- – 3 كوبايات دقيق شوفان و ممكن نستخدم دقيق اسمر او القمح الكامل.
- ماية دافيه للعجن.
- معلقة كبيرة خميرة فوريه.
- – 3 معالق من الزيت.
- ملح.
- صلصة البيتزا:-
- معلقة كبيرة زيت زيتون.
- معلقة كبيرة توم مفروم.
- نص برطمان صلصة طماطم.
- – 2 من الطماطم المتقشرة و متقطعه مكعبات.
- زعتر.
- ملح.
- فلفل اسود.
- ريحان.
- الاضافات:-
- جبنة قليلة الدسم مبشورة.
- زيتون اخضر متقطع شرايح.
- مشروم شرائح.
- فلفل الوان شرايح.
- صدر فرخه متقطع شرايح صغيرة او تونه او اى مكون اضافى على حسب الرغبة.
- ريحان طازة.
- طريقة التحضير:-
- العجينة:-
- نملى نص كوباية ماية دافية و نحط عليها الخميرة و نقلبهم ببعض و نسيبهم على جنب شوية.
- نحط دقيق الشوفان فى العجانة و عليه الملح و نقلبهم فى بعض.
- نضيف عليهم الماية و الخميرة و 3 معالق الزيت و ممكن نضيف كمان معلقة عسل على حسب الرغبة و نشغل العجانة على سرعه قليلة و نضيف ماية دافية واحدة واحدة لحد ما تتكون عندنا عجينه متماسكه.
- و نسيب العجينه لمدة ساعه على الاقل لحد ما نجهز الصلصة و صدر الفرخة.
- الصلصة:-
- فى طاسه على النار نحط معلقة زيت زيتون و عليه معلقة توم و نقلبهم فى بعض لحد ما التوم يتشوح.
- نضيف عليه الصلصة و الطماطم المتقطعه و زعتر و ملح و فلفل اسمر و ربحان مبشور و نقلبهم فى بعض كويس و نسيبهم على النار لحد ما تتسبك و كده تبقى جاهزة عندنا.
- صدر الفرخة:-
- نتبل شرايح الفراخ بالملح و الفلفل الاسمر.
- و فى طاسه على النار نحط فيها معلقة صغيرة من زيت الزتون و نضيف عليها شرايح الفراخ المتقطعه و نشوحها كويس لحد ما لونها يتغير.
- تحضير البيتزا:-
- نشغل الفرن على درجة حرارة 180 و نسيبه لحد ما يسخن.
- فى صنية نحط فيها ورق زبدة و نفرد العجينة عليها لحد ما تبقى طبقة رقيقة جدا.
- نضيف عليها الصلصة و نفردها كويس.
- نحط عليها شرايح الفراخ اللى شوحناها و بعد كده الزيتون الشرايح و الفلفل الشرايح و الجبنة قليلة الدسم (موتزريلا او شيدر او بارميزان على حسب الرغبة).
- و نحط الريحان الطازة على الوش و كده تكون البيتزا جاهزة عندنا.
- ندخلها الفرن و نسيبها من 30 ل 40 دقيقة لحد ما تستوى و نطلعها من الفرن و نقدمها و هى سخنة.
- ملاحظة من المفضل شرب كمية كبيرة من المايه مع الوصفة.
- و كده نكون انتهينا من تقديم وصفة البيتزا الصحية و بطريقة سهلة و بسيطه.
- تحتوى البيتزا بالشوفان على 200 سعر حرارى للحصة الواحدة ( مقدار ربع بيتزا).
- و تحتوى بيتزا الشوفان على قيم و عناصر غذائية كتيرة و مهمه و منها:-
- تحتوى على 3.3 جم من الدهون.
- تحتوى على 0.8 جم من الدهون المشبعه.
- تحتوى على 0.2 جم من الدهون الغير مشبعة.
- تحتوى على 33 جم من الكربوهيدرات.
- تحتوى على 2.2 جم من السكر.
- تحتوى على 6 جم من الالياف الغذائية.
- تحتوى على 17 جم من البروتين.
- تحتوى على 2.4 جم من الكولسترول.
