- مريم رجب
- 0 Comments
- 252 Views
النهاردة جبتلكم وصفة حلوة و كتير مننا بيحبها و هى وصفة الشاورما اللحم بس ناس كتير بتخاف تكلها علشان سعرتها الحرارية عالية لكن بالطريقة دى تقدروا تستمتعوا باكل الشاورما المفضلة عندكم بطعمها الرائع و في نفس الوقت تحافظوا على رشاقتكم و تنفع فى وجبات الدايت.
- المقادير:-
- نص كيلو لحمة نسبة الدهون فيه تكون قليلة.
- فصين توم.
- نص كوبايه عصير برتقال.
- عصير ليمونه.
- معلقتين خل تفاح.
- معلقة زيت زيتون.
- معلقتين كبار زبادى يونانى.
- ربع معلقة حبهان مطحون.
- نص معلقة بهارات شاورما.
- نص معلقة ملح.
- ربع معلقة جنزبيل فريش مفروم.
- طريقة التحضير:-
- هنجيب بوله و نحط فيها التوم المهروس و عصير البرتقال و عصير الليمون و خل التفاح و زيت زيتون و الملح و الحبهان و بهارات الشاورما و الجنزبيل الفرش و الزبادى اليونانى و نقلب كل المكونات دى فى بعض كويس لحد ما كل ده يتجانس ببعض.
- و بعدين نجيب اللحمة و نقطعها شرايح رفيعه و بعد كده نحطها على الخليط اللى عملناه و نقلبهم كويس ببعض و نغطى البوله بكيس بلاستك و ندخل البوله التلاجه لمدة 4 ساعات على الاقل و يبقى احسن اننا نسيبها فى التلاجه وقت اكتر علشان اللحمة تتشرب من التتبيلة كويس.
- فى طاسه على النار و تبقى درجة الحرارة متوسطه و نحط فيها معلقة كبيرة من زيت الزيتون و لما يسخن نضيف فيه شرايح اللحمة اللى تبلناها و نفضل نقلب فيها لحد ما تستوى تقريبا هتفضل على النار لمدة ربع ساعه.
- و بعدين نشيلها من على النار و نقدمها فى طبق مناسب مع السلطة او الارز البنى او المكرونة الحبوب الكاملة و نقدمها و هى سخنه.
- و كده نكون قدمنا الشاورما اللحمة بدهون قليله بطريقة سهلة و بسيطه و صحية كمان.
- يحتوى 100 جرام من الشاورما اللحم بدهون قليله على 200 سعر حرارى تقريبا.
- و يحتوى هذا الطبق على قيم و عناصر غذائية مهمه و مفيدة للجسم و منها:-
- تحتوى على 12 جرام من الدهون.
- تحتوى على 2.1 جم من الدهون المشبعة.
- تحتوى على 10 جرام من الكربوهيدرات.
- تحتوى على 0.4 جم من الالياف الغذائية.
- تحتوى على 1 جم من السكر.
- تحتوى على 20 جم من البروتين.
- تحتوى على 50 مجم من الكولسترول.
- تحتوى على 400 مجم من الصوديوم.
- تحتوى على 360 مجم من البوتاسيوم.
- تحتوى على 1 مجم من الحديد.