- مريم رجب
- 0 Comments
- 110 Views
السمبوسك من الاكلات اللذيذة و السهلة جدا و من اشهر اطباق المقبلات و مشهورة بالاخص فى شهر رمضان و غالبا بيحبها الجميع و ينفع نعملها بحشوات كتير مختلفة على حسب الرغبة فى اكلها و لكن دايما السمبوسك معروفة ان سعرتها الحرارية عالية جدا و لكن النهاردة هنقدمها بطريقة تكون سعرتها الحرارية قليلة و تنفع للدايت
- المقادير:-
- مقادير عجينة السمبوسة:-
- كوباية دقيق شوفان.
- كوبايتين مايه دافية.
- ربع معلقة ملح.
- مقادير الحشو:-
- معلقة زيت زيتون.
- بصلة صغيرة.
- فصين توم.
- ربع لحمة مفرومه قليلة الدسم.
- جزرة مبشورة.
- فلفل الوان متقطع قطع.
- رشة ملح.
- رشة فلفل اسود.
- رشة قرفة.
- رشة جنزبيل.
- عودين بقدونس.
- رشة زعتر.
- نص ليمونه.
- مقادير الحشو تانية:-
- – 2 بطاطس مسلوقة.
- ربع حزمة بقدونس متقطع.
- – 1 فلفل اخضر حامى متقطع.
- طريقة التحضير:-
- عجينة السمبوسة:-
- نحط فى الخلاط كوباية دقيق الشوفان و عليه كوبايتين المايه الدافية و رشة الملح و نضربهم كويس لحد ما يبقى عندنا خليط قوامه متوسط.
- نصب الخليط فى بوله و نسيبه 10 دقايق يرتاح لحد ما نجهز الحشو بتاعتها.
- تحضير حشوة اللحمة:-
- فى طاسه على النار هنحط معلقة زيت الزيتون و نحط عليها بصلة متقطعه قطع صغير و نقلبهم فى بعض لحد ما البصل يبدأ يتشوح.
- و بعد كده نحط فصين التوم المهروسين و نقلبهم فى الزيت و البصل لحد ما ريحته تبدأ تظهر.
- نحط عليهم اللحم و تكون نسبة الدهون فيها قليلة تماما و نقلبها كويس لحد ما لونها يتغير.
- نضيف عليها جزرة مبشورة و فلفل الوان متقطع و تقلب كل المكونات ببعض.
- نضيف رشة الملح و رشة الفلفل الاسود و رشة قرفة و رشة جنزبيل و رشة زعتر و البقدونس المتقطع و نقلب المكونات كلها ببعض كويس و نعصر عليها نص ليمونه و نسيبها لحد ما تستوى.
- تحضير حشوة البطاطس:-
- فى بوله نحط فيها البطاطس المسلوقة و نحط عليها الفلفل الحامى و البقدونس المتقطع و رشة ملح و رشة فلفل اسود و نقلبهم كويس لحد ما تبقى مهروسه كويس.
- نعمل بقى طبقات السمبوسة:-
- نقلب الخليط بتاعنا كويس بالمعلقة و بعد كده نحط صنية مستطيلة على النار و بالفرشه بتاعتنا ناخد من الخليط و نحط طبقة على شكل مستطيل و لما اول طبقة تتشرب نحط طبقة تانية و هكذا تقريبا كل واحدة هنعملها من 3 او 4 طبقات.
- نطلع العجينه من الطاسه و نحطها فى طبق و نغطيها بقماشة علشان تفضل طرية معانا.
- نكرر الخطوات دى لحد ما نخلص كل الكمية اللى عندنا.
- نبدأ نحضر السمبوسك:-
- نجيب شريحة من عجينه السمبوسك و نحشيها على لحمة معصجة اللى حضرناها سوى او بطاطس مهروسه او اى حشو على حسب الرغبه و لكن ياريت اى حشو نستخدمها تبقى السعرات الحرارية بتاعتها قليلة.
- و بعد ما نخلص و نحشى كل السمبوسة نرصها فى صنية مبطنه بورق زبدة و ندهنها بدهنة زبدة او بزيت زيتون.
- و نشغل الفرن على درجة حرارة 180 و نسيبه لما يسخن و بعد كده ندخل الصنية الفرن لمدة 10 دقايق و بعد كده نطلعها من الفرن و نقدمها.
- و فى طريقة تانيه علشان نسويها اننا نحط معلقة من زيت الزيتون البكر فى طاسه و لما يسخن نحط السمبوسه و نقلبها على كل جنب لحد ما تستوى و لكن الافضل اننا نسويها فى الفرن.
- و كده نكون قدمنا السمبوسك بطريقة سهلة و بسيطه و بشكل صحى جدا و تنفع فى الدايت.
- تحتوى السمبوسك على 110 سعر حرارى لكل 2 منها.
- تحتوى السمبوسك على قيم و عناصر غذائية مهمة و مفيدة للجسم و منها:-
- تحتوى على 4.08 جم من الدهون.
- تحتوى على 1.2 جم من الدهون المشبعة.
- تحتوى على 2.5 جم من الدهون الغير مشبعه.
- تحتوى على 11 جم من الكربوهيدرات.
- تحتوى على 2.1 جم من الالياف الغذائية.
- تحتوى على 0.25 جم من السكر.
- تحتوى على 8 مجم من الكولسترول.
- تحتوى على 44.3 مجم من الصوديوم.
