- مريم رجب
- 0 Comments
- 144 Views
من احلى الاكلات اللى ممكن تتقدم فى الدايت لانها سعرتها الحرارية قليلة جدا و هى وجبة صحية و بالاضافه لكده ان طعمها لذيذ و مميز جدا و من الوجبات الغذائية المكتملة و المشبعه كمان و هنقدمها النهاردة بطريقة بسيطة و مكونات صحية.
- المقادير:-
- – 2 ستيك لحمة بقرى من الانتركوت.
- كوباية لبن خالى الدسم.
- معلقتين كبيرة من الشوفان المطحون.
- رشة ملح.
- رشة فلفل اسود.
- بصلة متقطعه مكعبات صغيرة.
- – 6 قطه مشروم.
- ربع معلقة من السبع بهارات.
- ربع معلقة من الزعتر.
- نص كوباية شوربة لحمة او فراخ.
- طريقة التحضير:-
- نتبل قطعتين الستيك بالملح و الفلفل الاسود كويس من الناحيتين و نسيبها 10 دقايق.
- فى طاسه على نار متوسطه نحط معلقتين زيت زيتون بكر او معلقتين زيت نباتى و لما الزيت يسخن نحط قطعتين الستيك فى الطاسه و نقلبهم على الناحيتين لحد ما يستوى تماما ز بعد كده نطلعهم من الطاسه و نحطهم فى طبق على جنب.
- فى نفس الطاسه مكان ما سوينا الستيك نحط معلقة زيت تانى ونضيف عليها البصل اللى قطعناه مكبات و نضيف عليها نص معلقة صغيرة مايه و نفضل نقلب فيهم 3 دقايق تقريبا لحد ما البصل يتشوح.
- نقطع المشروم شرايح او قطع صغيرة و نضيفهم على البصل و نفضل نقلب فيهم لحد ما المشروم يدبل.
- نضيف ربع معلقة من السبع بهارات و عليهم ربع معلقة زعتر و نضيف عليهم نص كوباية الشوربة و نسيبهم على نار عاليه.
- اول ما يبدأ الخليط يغلى نحط كوباية اللبن و معلقتين الشوفان المطحون و نقلبهم فى بعض كويس لحد ما يبقى قومهم مناسب و الصوص يبقى تقيل.
- بعد كده نضيف الستيك على صوص المشروم و نقلبهم مع بعض و نحطهم فى طبق مباشر و نقدمه و هو سخن.
- و كده نكون عملنا ستيك اللحمة بصوص المشروم بطريقة سهلة و بسيطه و مكونات صحية و طعمها لذيذ.
- و يحتوى طبق الستيك بصوص المشروم على 193 سعر حرارى تقريبا.
- و يحتوى هذا الطبق على قيم و عناصر غذائية مهمه و مفيدة للجسم ومنها:-
- تحتوى على 4.7 جم من الدهون.
- تحتوى على 1.1 جم من الدهون المشبعه.
- تحتوى على 3.1 جم من الدهون الغير مشبعة.
- تحتوى على 16.2 جم من الكربوهيدرات.
- تحتوى على 2.4 جم من الالياف الغذائية.
- تحتوى على 10.2 جم من السكر.
- تحتوى على 19.6 جم من البروتين.
- تحتوى على 34.1 مجم من الكولسترول.
- تحتوى على 228 مجم من الصوديوم.
