الفراخ بالبروكلي و الصويا صوص واحدة من الأكلات الشهية و الصحية في نفس الوقت البروكلي ده نوع من الخضروات اللذيذة و المغذية و الصويا صوص ده صوص صيني معروف بالنكهة الرائعة و الطعم المميز و الاهم انه من الوجبات المشبعه و من الوجبات اللى تنفع فى الدايت او اى نظام غذائى صحى
- المقادير:-
- نص كيلو صدور فراخ متقطعه مكعبات.
- نص معلقة صغيرة ملح.
- كوباية صويا صوص.
- ربع معلقة فلفل اسود.
- معلقتين سمسم صغيرين.
- معلقة صغيرة جنزبيل.
- ربع كوباية عسل.
- فصين توم.
- كوباية بروكلى متقطع.
- معلقتين زيت زيتون.
- طريقة التحضير:-
- فى طاسه على النار نحط فيها زيت الزيتون و لما يسخن نضيف عليه قطع صدور الفراخ و نفضل نقلب فيه لحد ما الفراخ تتحمر و تستوى و بعد كده نضيف عليه الملح و الفلفل الاسود و نوطى النار تماما عليها.
- و فى بوله غويطه نحط فيها كوباية الصويا صوص و عليها كوباية العسل و معلقتين السمسم و فصين التوم المهروسين و الجنزبيل البودر و نقلب كل الخليط ده ببعضه لحد ما العسل يدوب مع باقى المكونات.
- و بعد كده نضيف خليط الصوص فى الطاسه على الفراخ و ننقلبهم و نضيف بعد كده قطع البروكلى و نقلب كل المكونات فى بعض و نخلى النار واطيه زى ما هى و نغطى الطاسه و نسيبها على النار لحد ما البروكلى يطرى و يستوى.
- و بعدين نطى النار عليها و نقدم الفراخ بالبروكلى و الصويا صوص فى طبق مناسب و نقدمه و هو سخن.
- و كده نكون قدمنا طريقة عمل صدور الفراخ بالبروكلى و الصويا صوص باسهل و اسرع طريقة تحضير.
- و يحتوى 100 جرام من هذا الطبق على 200 سعر حرارى تقريبا.
- و يحتوى هذا الطبق على قيم و عناصر غذائية مهمه و مفيدة للجسم و منها:-
- يحتوى على 6.3 جم من الدهون.
- يحتوى على 0.9 جم من الدهون المشبعه.
- يحتوى على 2.9 جم من الدهون الغير مشبعة.
- يحتوى على 15.05 جم من الكربوهيدرات.
- يحتوى على 1.2 جم من الالياف الغذائية.
- يحتوى على 6 جم من السكر.
- يحتوى على 29.3 جم من البروتين.
- يحتوى على 66 مجم من الكولسترول.
- يحتوى على 396 مجم من الصوديوم.
- يحتوى على 568 مجم من البوتاسيوم.
