التاكو سلطة مكسيكية حلوة و منعشة و هي واحدة من ألذ الأطباق اللي بتقدم في العديد من المطاعم و المناسبات الحلوة بتتكون التاكو من مكونات بسيطة و متوفرة و هي سهلة التحضير ؛ و ممكن تكون وجبة خفيفة لوحدها أو تكون جزء من وجبة رئيسية
- المقادير:-
- نص كيلو لحمة مفرومة قليله الدهون.
- رشة ملح.
- رشة فلفل اسود.
- كوباية فاصوليا حمرا.
- – 6 ورقات من الخس الكابوتشى.
- – 4 طماطم متقطعة مكعبات.
- ربع كوباية جبنة بارميزان مبشورة.
- – 1 بصل اخصر متقطع.
- نص معلقة بهارات تاكو.
- ربع معلقة صغيرة توم بودر.
- نص معلقة كرفس بودر.
- معلقتين كبار كاتشب.
- ربع معلقة صغيرة سكر.
- معلقة كبيرة زيت زيتون.
- – 3 معالق خل ابيض.
- ربع كيلو لبنة لايت.
- – 4 كوبايات لبن خالى الدسم.
- – 1 فلفل اخضر حامى.
- تورتيلا بدقيق الشوفان.
- طريقة التحضير:-
- فى طاسه غويطه على النار نحط فيها زيت الزيتون و لما يسخن ننزل عليه باللحمة المفرومة و رشة الملح و رشة الفلفل الاسود و نقلبهم كويس و نسيبها لحد ما اللحمة تستوى كويس.
- بعد كده نضيف عليها البصل الاخضر المتقطع و الفلفل الاخضر الحامى و الفاصوليا الحمرة و بهارات التاكو و التوم بودر و الكرفس بودر (لو مش متاح عندنا ممكن نستخدم عودين كرفس مفرومين) و الكاتشب و السكر و الخل و نقلب كل المكونات فى بعض كويس و نسيبها على النار لمدة دقيقتين.
- نجيب خبز التورتيلا و نقطعه مكعبات و ندخله الفرن 5 دقايق لحد ما يتحمص و يبقى ناشف.
- نفرد طبقتين من الخس و نحط فى النص جزء من خليط اللحمة و نحط عليهم الطماطم و الجبنة البارميزان و مكعبات التورتيلا المتحمص و نعيد الخطوات دى فى باقى المكونات.
- و نجيب بوله مناسبة و نحط فيها اللبن الخالى من الدسم و اللبنة الخالية من الدسم و نقلبهم مع بعض كويس.
- نقدم سلطة التاكو و خليط اللبن و اللبنة فى اطباق مناسبة و نقدر نقدمها كوجبة رئيسية او طبق جانبى.
- و كده نكون قدمنالكم سلطة التاكو باسهل و اسرع طريقة تحضير.
- و يحتوى 100 جرام من سلطة التاكو الصحية على 160 سعر حرارى تقريبا.
- و تحتوى سلطة التاكو على قيم و عناصر غذائية مفيدة للجسم و منها:-
- تحتوى على 8.4 جم من الدهون.
- تحتوى على 1.4 مجم من الدهون المشبعة.
- تحتوى على 12 جم من الكربوهيدرات.
- تحتوى على 1.3 جم من الالياف الغذائية.
- تحتوى على 4 جم من السكر.
- تحتوى على 7.6 جم من البروتين.
- تحتوى على 22 مجم من الكولسترول.
- تحتوى على 385 مجم من الصوديوم.
- تحتوى على 210 مجم من البوتاسيوم.
- تحتوى على 1.15 مجم من الحديد.
- تحتوى 97 مجم من الكالسيوم.
